ചരിത്രത്തില്‍ ആദ്യമായി വേങ്ങരയില്‍ 71.9 ശതമാനം പോളിങ് രേഖപ്പെടുത്തി


വേങ്ങര: ചരിത്രത്തില്‍ ആദ്യമായി വേങ്ങരയില്‍ 71.9 ശതമാനം പോളിങ് രേഖപ്പെടുത്തി. ഉയര്‍ന്ന പോളിങ് ശതമാനം ഇരു മുന്നണിക്കും വലിയ പ്രതീക്ഷയാണ് നല്‍കുന്നത്. ലീഗ് വോട്ടുകള്‍ പരമാവധി പോള്‍ ചെയ്തതാണ് വോട്ടിങ്ങ് ശതമാനം കൂടാന്‍ കാരണമെന്ന് യുഡിഎഫ് പറയുമ്പോള്‍, സംഘപരിവാര്‍ വിരുദ്ധ വോട്ടുകള്‍ തങ്ങള്‍ക്ക് ലഭിച്ചെന്നാണ് ഇടതു പക്ഷത്തിന്‍റെ അവകാശ വാദം. 2016 ലെ നിയമസഭ തെരഞ്ഞെടുപ്പില്‍ ഉണ്ടായ 70.77 എന്ന ശതമാനക്കണക്കായിരുന്നു മണ്ഡലത്തിലെ ഏറ്റവും ഉയര്‍ന്ന പോളിങ്ങ്. 71.9 എന്ന പുതിയ കണക്ക് ഇരു മുന്നണികള്‍ക്കും ഒരു പോലെ ആശയും ആശങ്കയും നല്‍കുന്നതാണ്. തെരഞ്ഞെടുപ്പ് ദിവസം ഇടതുമുന്നണി പൊട്ടിച്ച സോളാര്‍ ബോംബിനെതിരെ തങ്ങള്‍ നടത്തിയ പ്രചരണം വോട്ടര്‍മാരെ ബൂത്തിലെത്തിച്ചുവെന്നാണ് യു ഡി എഫ് നേതൃത്വം പറയുന്നത്. അത് കൊണ്ട് തങ്ങളുടെ ഭൂരിപക്ഷം കൂടുമെന്നാണ് അവരുടെ അവകാശവാദം. ലീഗ് വിരുദ്ധ വോട്ടുകള്‍ പരമാവധി പെട്ടിയിലായെന്നാണ് ഇടത് നേതാക്കള്‍ കണക്കുകള്‍ ചൂണ്ടിക്കാട്ടി പറയുന്നത്. പുരുഷ വോട്ടര്‍മാര്‍ കൂടുതലുള്ള മണ്ഡലത്തില്‍ സ്ത്രീ വോട്ടര്‍മാര്‍ അധികമായി വോട്ട് ചെയ്യാനെത്തിയത് തങ്ങള്‍ക്ക് ഗുണം ചെയ്യുമെന്നാണ് മുന്നണിയുടെ വിലയിരുത്തല്‍. ഒരു പക്ഷെ ജയിച്ചില്ലെങ്കിലും മണ്ഡലത്തില്‍ ലീഗ് കോട്ടകളില്‍ വലിയ കടന്ന് കയറ്റം നടത്താനായെന്ന വിലയിരുത്തലാണ് വോട്ടെടുപ്പിന് ശേഷമുള്ള കണക്കെടുപ്പ് കഴിഞ്ഞും ഇടതുപക്ഷം ചൂണ്ടിക്കാട്ടുന്നത്. പിടി ആലിഹാജി നേടിയ ഏഴായിരത്തിലധികം വോട്ടുകള്‍ ഇത്തവണ കൂട്ടുമെന്നാണ് ബിജെപി നിലപാട്. വോട്ട് കൂടുമെന്ന് എസ് ഡി പി ഐയും ഉറച്ച പ്രതീക്ഷയിലാണ്.

Post A Comment: